Татар фольклор утырмалары

Айбаш авыл китапханәсендә «Пушкин картасы» программасы кысаларында югары сыйныф укучылары өчен фольклор утырмалары узды. Чара яшьләр арасында милли мәдәниятне, гореф-гадәтләрне һәм фольклорны популярлаштыруга юнәлдерелгән иде. Катнашучыларның һәркайсы фольклор турында белеп кенә калмыйча, фольклор уеннарында да катнаша алды. Алар: «Йөзек салыш», «Түбәтәй», «Тукмаклы», «Капкалы», «Так калыш» һ.б. Уеннардан соң егетләр һәм кызлар үз фикерләре белән уртаклаштылар, киләчәктә дә бу уеннарны уйнарга вәгъдә бирделәр.