Күпкырлы әсәрләр остасы

Якташ язучы Солтан Шәмсинең 80 яшьлегенә Олы Битаман авылы китапханәсендә китап күргәзмәсе оештырылды. Күргәзмәдә авторның биографик материаллары һәм китапханә фондыннан әсәрләре тәкъдим ителә. Солтан Шәмси язучы-прозаик, татар халкы тарихы буенча хикәя һәм повестьлар, нәфис-публицистик китаплар авторы буларак билгеле. Әдәби-иҗат эшчәнлеген ул тәрҗемәдән башлый. Ул тел һәм тәрҗемә кыенлыклары турында күп кенә китаплар һәм публицистик мәкаләләр авторы. Язучының оригиналь прозасының беренче китабы – «Көмеш чылбыр» исемле хикәяләр җыентыгы. Аннары бер-бер артлы хикәяләр, повестьлар һәм публицистика җыентыклары басылып чыга.